Azərbaycanın istedadlı rəssamı Vüsal Rəhim XX əsrin görkəmli rus yazıçılarından olan Andrey Platonovun şərəfinə adlandırılan Beynəlxalq Platonov İncəsənət Festivalının iştirakçısı olub.
YARAT Müasir İncəsənət Məkanından bildirilib ki, Rusiyanın Voronej şəhərində beşinci dəfə keçirilən bu festival son beş ildə bölgənin başlıca mədəniyyət layihəsinə çevrilib.
Festival tamaşaçılara incəsənət aləminin müxtəlif istiqamətlərində mühüm yaradıcılıq nailiyyətlərinin iştirakçısı olmaq imkanı verir və məqsədi Voroneji Rusiya mədəniyyətinin liderlərindən biri qismində təsdiq etməkdən ibarətdir. Platonov festivalı hər il "Musiqi", "Teatr", "Təsviri incəsənət" və "Ədəbiyyat" istiqamətlərində keçirilir. İndiyədək bu festivalda müasir dövrümüzün görkəmli musiqiçiləri, rəssamları və ədəbiyyatçıları iştirak ediblər. Keçən il festivalın "Dünya musiqisi" bölməsində xalq artisti Alim Qasımov da çıxış edib.
Platonov festivalının vizual proqramı MDB ölkələrindən olan rəssamların yaratdıqları əsərlər şəklində sərgi salonlarından küçələrə, minlərlə insanların görüşünə çıxır. Qədim ayinlər, ənənələr mövzularına və mənsub olduğu xalqın tarixinə müraciət edən rəssamlar tamaşaçıların diqqətini müxtəlif sivilizasiyaların kəsişmə nöqtələrinə və mədəni abidələrə qayğıkeş münasibətin zəruriliyinə yönəldirlər.
Vüsal Rəhim yaradıcılığında qədim bütlər və şamançılıq mövzusu ilə daim eksperiment aparır. Onun festivalı çərçivəsində həyata keçirmək üçün təklif etdiyi konsepsiya açıq havada "Kainat" adlı sənətkarlıq nümunəsindən, habelə "Od qadını" incəsənət predmetindən ibarət olub. "Kainat" əsərinin təqdim olunmasının əsas məqsədi diametri mərkəzə doğru kiçilən çevrələrin tam mərkəzində mövqe tutmuş rəssamın qırmızı və sarı gildən yaratdığı qadın, kişi və heyvan kimi heykəltəraşlıq nümunələrini nümayiş etdirməkdən ibarətdir.
Müəllifin qeyd etdiyi kimi, "bu heykəltəraşlıq nümunələri üçün başlıca prototip rolunu təkcə Azərbaycanın müxtəlif bölgələrində deyil, həm də dünyanın bütün bölgələrində müxtəlif vaxtlarda tapılmış qədim bütlər oynayır. Dairələr üçün seçilmiş oxra rəngi onun semantikası ilə əlaqədardır. Oxra hər şeyin başlanğıcı olan yeri və torpağı təcəssüm etdirir. Rəssam isə yüksək başlanğıc, təmizlik və yaradılış qüvvəsi kimi bəyaz geyimdə olmalıdır".
Vüsal Rəhim əcdadların irsi mövzusunu yenidən işləyərək, dini qadın fiqurlarını incəsənət nümunələrində təcəssüm etdirir. O, fiqurları ənənəvi xalçaçılıq sənətinin naxışları və kompozisiyaları ilə bəzəyir. Azərbaycan xalçaları Şərq xalçaçılıq sənətinin bir şaxəsini təşkil edir. Qadın, onun obrazı ətrafındakı sitayiş mövzusu da Azərbaycanda qədim tarixə malikdir və məhsuldarlıqla assosiasiya olunur. Rəssam "Od qadını" əsərində Azərbaycan xalqının mədəniyyətinin mahiyyətcə müxtəlif olan bu cəhətlərini müasir incəsənət kontekstində maksimum dərəcədə qabarda bilib. Vüsal Rəhim 1987-ci ildə Gəncədə doğulub. O, Azərbaycan Dövlət Rəssamlıq Akademiyasında təhsil alıb. Gənc rəssam Azərbaycanda və xaricdə çoxsaylı sərgilərin və layihələrin iştirakçısıdır. 2013-cü ildə onun YAY Qalereyasında "Qara qadın" adlı fərdi, 2015-ci ildə isə ABŞ-da "Duet" Qalereyasında amerikalı xanım həmkarı ilə birgə sərgisi açılıb.
S.ABDULLAYEVA
çap et