Milli Məclis (MM) sədrinin müavini Bahar Muradova Birləşmiş Millətlər Təşkilatının Uşaq Fondunun (UNİCEF-in) Azərbaycandakı yeni təyin edilmiş nümayəndəsi Andro Şilakadze ilə görüşüb.
Görüş zamanı B.Muradova bildirib ki, Azərbaycanın beynəlxalq təşkilatlarla əlaqələri yüksələn xətlə inkişaf edir və onların arasında UNİCEF-in öz yeri var: "Bu qurumla parlament səviyyəsində yüksək səviyyəli əməkdaşlıq mövcuddur. İndiyədək Milli Məclisdə UNİCEF-in dəstəyilə uşaq hüquqlarının qorunmasına həsr olunub, bir sıra qanunlar qəbul edilib, bir sıra qanunlara isə dəyişikliklər olunaraq daha da təkmilləşdirilib".
B.Muradova bundan sonra da UNİCEF-lə əməkdaşlığın uğurlu olacağına əminliyini ifadə edib. Görüşdə ölkənin birinci xanımı, MM-in deputatı Mehriban Əliyevanın təşəbbüsü ilə Azərbaycanda uşaq hüquqlarının müdafiəsi sahəsində görülmüş işlərdən də söhbət açılıb.
A.Şilakadze Azərbaycanın sürətli inkişafından danışıb və UNİCEF-in də bu inkişafa öz töhfəsini verməyə hazır olduğunu diqqətə çatdırıb.Azərbaycanda uşaq hüquqlarının müdafiəsi sahəsində qanunvericiliyi yüksək qiymətləndirən qonaq cari il noyabrın 20-də Uşaq Hüquqları Konvensiyasının 25-ci ildönümü olacağını deyən A. Şilakadze bu əlamətdar hadisənin dünyanın bir çox ölkələrində qeyd ediləcəyini bildirdi və bununla bağlı MM-in xüsusi iclasının keçirilməsi təklifini irəli sürüb.
Söhbət zamanı MM-də uşaq hüquqları ilə bağlı resurs mərkəzinin yaradılması və qarşılıqlı əməkdaşlığın perspektivləri barədə fikir mübadiləsi aparılıb.
K.HƏMZƏOĞLU