"İstənilən dövrdə, istənilən seçki prosesi ərəfəsində "sürprizlər"ə hazır olmaq lazımdır".
Bunu mətbuata açıqlamasında Yeni Azərbaycan Partiyası (YAP) İdarə Heyətinin üzvü, vitse-spiker Bahar Muradova qarşıdan gələn 2015-ci il parlament seçkiləri ərəfəsində hakimiyyət daxilində hansısa "sürpriz"lərin yaşadılmasına, o cümlədən, seçkilərlə bağlı hansısa ssenarilərin həyata keçirilməsinə cəhdlərin edilməsinin mümkünlüyü məsələsinə münasibətini bildirərkən dilə gətirib. Onun sözlərinə görə, bəzi dairələr və qüvvələr tərəfindən Azərbaycanla bağlı hədəflər, maraqlar hələ də dəyişmədiyindən zamana,hadisələrə görə bu "sürpriz"lər sadəcə, xarakterini dəyişə bilər, amma bununla belə, "sürpriz"lər həmişə olacaq və gözləniləndir. "Biz də buna hazır olmalıyıq, hazırıq da. Ancaq əsas odur ki, istər Azərbaycan dövləti, istərsə də bugünkü Azərbaycan hakimiyyəti həmin dairələrin kənardan törətmək istədikləri kataklizmlərə heç zaman rəvac verməyəcək"-deyən
B. Muradova eyni zamanda bildirib ki, indiyə qədər hakimiyyət komandasında olan şəxsləri bir-birinə qarşı qoymağa, onları gözdən salmağa, qaralamağa xidmət edən kampaniyalar olub və yəqin ki, bundan sonra da bu və ya digər şəkildə o kampaniyalar davam edəcək:
"Azərbaycandakı maraqlarını məhz bu fəal siyasi kampaniya gedişində bu və ya digər hadisələr törətməklə onun nəticələrindən istifadə edərək reallaşdırmağa çalışanlar da olacaq.
Bu prosesdə xarici havadarların tapşırıqlarını yerinə yetirmək üçün bundan bir şans kimi istifadə etmək istəyən bizim öz daxili soydaşlarımız da olacaq. Bunlara da hazırıq və hazır olmaq lazımdır. Eyni zamanda, kimsə də düşünməsin ki, onların bizə qarşı bu cür xəbis niyyətlərə xidmət edən proqramları mövcud olduqca, bizim də müqavimət hissimiz zəifləyəcək. Əksinə, bunlar bizim müqavimət gücümüzü, hissimizi, əzmimizi daha da möhkəmləndirir və zaman göstərir ki, bütün bu kampaniyalar olmasına rəğmən biz Azərbaycanın seçki qanunvericiliyinə, Azərbaycanın qanunlarına, Konstitusiyasına, Azərbaycan dövlətinin öz vətəndaşları qarşısında öhdəliyinə uyğun şəkildə işlərimizi qura bilmişik. Bu gün də, bundan sonra da belə olacaq. Həmçinin, Azərbaycanın ictimai-siyasi elitası qanun çərçivəsində öz işini quracaqsa, çox normal, ədalətli, sərbəst, azad, şəffaf seçkilər keçiriləcək. Azərbaycan növbəti 5 il üçün yenə də müəyyən şəxslərə, müəyyən siyasi qüvvələrə onun adından danışmaq mandatını verəcək. Ona görə də kimlərsə bu işdə şəffaf şəkildə iştirak etmək istəyirsə, Azərbaycanın qapıları onun üzünə açıqdır, kimlərsə qara niyyətlə gələcəklərsə, onların niyyətləri hər zamankı kimi puç olacaq".
K.HƏMZƏOĞLU
çap et