525.Az
Səni unutmayacağıq, İsa Kayacan!
İlahi, bir ildə nə qədər doğma insan itirmək olar?..
İlahi, bir ildə nə qədər qardaşlaşmış dostlarla əbədi vidalaşmaq olar?..
İlahi, bir ildə nə qədər “Ustad” deyə biləcəyin müəllimini ölümsüzlüyə uğurlamaq olar?..
Öncə Tofiq ABDİNSİZLİK “ABİ”sizliyi!..
Sonra Adil MİRSEYİDSİZLİK faciəsi!..
Ardınca Arif ƏMRAHOGLUSUZLUQ məşəqqəti!..
İndi də telefonda professor Hayrettin İvginin “Elçin hoca, İsa Kayacanı kaybettik” hönkürtüsü...
Amansız “xərçəng”lə 3 illik mücadilənin uğursuz sonluğu – İSA KAYACANSIZLIQ!
“Türk mətbuatının İmperatoru” da ölümsüzlüyünə qovuşdu!
Azərbaycan ən böyük dostlarından birini və ən böyük sevdalısını itirdi...
İsa Kayacan Ankaranın Karşıyaka Məzarlığında əbədiyyətə “Mərhaba!!!” söylədi...
Amma İsa Kayacanın Türkiyə mətbuatındakı əfsanəvi yeri, son 25 ildə Azərbaycan haqqında yazdığı kitabları və minlərlə məqalələri, Türk Dünyasından hərəsi 20-30 sayda qəzet və dərgilərdə dərc edilən saysız-hesabsız yazıları və kitabları həmişə öz aktuallıqlarını saxlayacaq və müəllifini bu xalqların ürəyində əbədi yaşadacaq.
Azərbaycan heç zaman səni unutmayacaq, İsa Kayacan!!!
Sən Türk Dünyasının qəlbində əbədi yaşayacaqsan!!!
Türkiyə mətbuatı bir daha sənin kimi əfsanəvi “İmperator” yetişdirməyəcək!!!
İnanıram ki, heç kim sənin haqqında keçmiş zamanda danışmayacaq, əziz qardaşım! Elə ilk olaraq mən də yazımı o ruhda davam etmək istəyirəm. “Koma”dan öncəki gün yayınlamaqda olduğum və hamısı mənim tərəfimdən hazırlanıb çap olunmuş, Azərbaycandakı sayca 5-ci kitabınla maraqlandın. Əvvəlki kitablarına yazdığım “ön söz”lərdən bəzi ayrıntıları bu kitaba da daxil etməmi istədin. İndi o cümlələri oxucularla bölüşürəm:
– “Öz əfsanəvi çalışmaları və əməlləriylə hər birimizin ürəyində fövqəladə iz salmış və qardaşlaşmış dünyaca ünlü türk qəzetəçisi və yazarı, şair, professor İsa Kayacan bu dəfə “Azərbaycan yazıları” adlı kitabının III cildi ilə görüşümüzə gəlir.
Professor İsa Kayacan bütün insanlığa örnək ömründə gerçəkdən sağlığında əfsanələşmiş bir insandır.
O, öz insanlıq naturasına görə əsfanəvidir. O, öz qəzetəçilik fəaliyyətinə görə əfsanəvidir. O, bir şair olaraq əfsanəvidir. O, bir yazar olaraq əfsanəvidir. O, Türk dünyası sevdasına görə əfsanəvidir. O, Azərbaycana xüsusi sevgisinə görə əfsanəvidir. Biz bu əfsanəviliklərə professor İsa Kayacanın “Vektor” Beynəlxalq Elm Mərkəzindən Fəxri Professor ünvanı almaq üçün ikinci dəfə Bakıya gəlişində də şahid olduq. Bu səfər zamanı Azərbaycan aydınlarının da İsa Kayacana olan əfsanəvi sevgisini seyr etdik.
Azərbaycan türkcəsiylə “Vektor” Nəşrlər Evi tərəfindən çap olunmuş və sonsuz oxucu sevgisi qazanmış “Əfsanəvi insan İsa Kayacan və Azərbaycan” adlı kitabında Türk basının İmperatoru və Yunus Əmrəsi kimi şərəfli bənzətmələri haqq etmiş İsa Kayacan haqqında görkəmli Türk və Azərbaycan aydınlarının məqalələri və fikirləri toplanmış və şair İsa Kayacanın şeir dünyasından bir sıra örnəklər verilmişdir.
Məşhur qəzetəçinin bu kitabında isə əsasən onun 2003-2014-cü illərdə qələmə aldığı Azərbaycanla ilgili yazılarının bir qismi və Türkiyə mətbuatında bir sıra Azərbaycan alimlərinin və aydınlarının İsa Kayacan haqqında çap olunmuş məqalələri toplanmışdır. Bu cildin də istəkli oxucularımız tərəfindən rəğbətlə qarşılanacağına ümid edirik”.
Çox sevdiyin Şahmar Əkbərzadənin məşhur bir misrası yadıma düşdü:
Ölüm də yalandı, itim də yalan,
Dünyada müqəddəs çevrilmələr var!
Müqəddəs çevrilmən mübarək, İsa Kayacan!!!
20.10.2014 çap et