"21-ci əsrdə Ermənistan monoetnik ölkə olaraq qalır"

"Neonasizm Avropada geniş vüsət almaqdadır. Əsas xüsusiyyətləri təcavüzkar milliyyətçilik və irqçilik olmaqla o, beynəlxalq hüququn təməl normaları və prinsiplərinin ciddi pozuntularına gətirib çıxarır, nəticədə bəşəriyyət dağıdıcı müharibələr, təcavüzkarlıq və etnik təmizləmələrdən əziyyət çəkir".

Bunu Azərbaycanın Avropa Şurası Parlament Assamblyesındakı (AŞPA) nümayəndə heyətinin üzvi Sahibə Qafarova sözügedən qurumun davam etməkdə olan payız sessiyasında çıxışı zamanı dilə gətirib. Onun dediyinə görə, bu qəbildən olan etnik təmizləmələrdən biri Ermənistan tərəfindən 1 milyon azərbaycanlıya qarşı həyata keçirilib: "20 ildən çoxdur ki bu ölkə Azərbaycan ərazisinin 20 faizini zəbt etməklə onun ərazi bütövlüyünə qəsd edib. Sözügedən siyasət nəticəsində indiki Ermənistan və işğal olunmuş Azərbaycan ərazilərində bir nəfər də olsun azərbaycanlı yaşamır və indi  yaşadığımız 21-ci əsrdə Ermənistan monoetnik ölkə olaraq qalır.  İnanıram ki, neonasizmə əks qüvvə olaraq tolerantlıq və multikulturalizm çıxış edir. Mən hər sessiyadan sessiyaya burada Azərbaycan xalqı barədə yanlış məlumatlar səsləndirən Zöhrabyana cavab vermək istəyirəm. Fəxrlə söyləyə bilərəm ki, bu iki dəyər əsrlərlə Azərbaycanda mövcud olub. Ölkəmizdə müxtəlif dinlərin və millətlərin nümayəndələri dinc yanaşı yaşamaqdadır".

S.Qafarova qeyd edib ki, bu gün Azərbaycanın ruslar, ukraynalılar , gürcülər və ermənilərdən ibarət olan xristian icması yerli müsəlman icması ilə bərabər hüquqlardan yararlanır: "Bir neçə ay öncə ölkə prezidentinin fərmanı ilə Azərbaycanda Bakı Beynəlxalq Multikulturalizm mərkəzi təsis edilib.  Bu addım multikultiralizm sahəsində ölkədə əsrlərdən bəri toplanmış böyük tarixi təcrübəyə qayğı zərurətindən qaynaqlanır. Bir neçə gün sonra Bakı 4-cü humanitar foruma ev sahibliyi edəcək və multikulturalizm tədbirin əsas müzakirə obyektlərindən olacaq. Sonda demək istəyirəm ki, müasir dünyada tolerantlıq və multikulturalizmə praktiki olaraq heç bir alternativ yoxdur. İnanıram ki, hamımızın ümumi məkanı olan Avropada bunu gerçəkləşdirə bilərik".

Kamil HƏMZƏOĞLU