“Bolqarıstan 2009-cu ildə qaz böhranından ən çox zərər çəkmiş ölkədir. Bu səbəbdən alternativ marşrutlar bizim üçün prioritetə çevrilib”.
APA-nın verdiyi məlumata görə, bunu bu gün “Əsrin Müqaviləsi”nin 20 illiyi və Cənub Qaz Dəhlizinin təməlqoyma mərasimində Bolqarıstan prezidenti Rosen Plevneliev deyib.
Bolqarıstan prezidenti qeyd edib ki, Ukraynadakı böhran enerji marşrutlarının diversifikasiyasının nə dərəcədə önəmli olduğunu ortaya qoyub:
“Cənub Qaz Dəhlizi illər uzunu həyata keçirilmiş asılılığın sonu olacaq. Rəqabətlilik və ədalətli qiymətlərin təklif edilməsi baxımından da Cənub Qaz Dəhlizi əhəmiyyətli olacaq. Bu kəmər Bolqarıstanı qazla təmin edəcək. Rumıniya, Serbiya və digər ölkələrə də qaz ixrac ediləcək. 2016-cı ilə qədər Yunanıstanla birləşdirici kəməri istifadəyə verəcəyik. Biz ən qısa müddətdə Türkiyə ilə Bolqarıstanı birləşdirən kəməri istifadəyə verməyə çalışırıq”.
R.Plevneliev bildirib ki, 2019-cu ildən 1 milyard kubmetr qaz Bolqarıstana ixrac ediləcək, gələcəkdə bu həcm artacaq:
“Biz Azərbaycanın xarici bazarlara çıxışını da təmin edəcəyik. Bu, “Nabucco”nun komponentlərindən biridir.
Avropaya yeni xəbərdarlıq lazım deyil, biz real işlərə başlamalıyıq. Bu gün Avropanın enerji təchizatı sahəsində mühüm addım atılır. Azərbaycan etibarlı tərəfdaş kimi özünü təsdiq edib. Biz şəbəkələrimizi, iqtisadiyyatımızı birləşdirərək xalqlarımızın iradəsini həyata keçiririk ki, dostluq və tərəfdaşlıq regionumuzda bərqərar olsun”.
çap et