ÜRƏYİMİ EŞİT, DÜNYA
Dünya çiyinlərimdə,
çiynim dünyadan ağır
endirdim başımı çiynimin üstə
gördüm qollarım yoxdur.
İki qolum - iki budaq.
İki qolum ikisi də dirəndilər göy üzünə.
Baxdım bədən torpaq üstə,
iki qolum ikisi də
üzür keçir göy üzündən.
Ürəyimi eşit, dünya!
Qollarım hövl eyləmiş,
Torpaq iki haçadır,
Körpu heyrət içində,
Məftillər qocalıbdır,
gör haçandır
iki yol arasında
qollar naçar qalıbdır!
Dünya! Mənə həyan ol,
Göyləri səksəndirmə,
qollarım yol gedəsidir,
Onu həsrət uçurub,
qollarıma ana ol,
qollarım yorulubdur,
qollarımı ovundur!
Dünya, mənə yiyə dur!
O sahilə... baxınca
ürəyim suya dönür,
Bədən qolsuz çırpınır,
yerə-göyə sığınmır,
Dağlar boy vermir mənə,
barı Allah göyündə
qollarıma yol eylə!
Dünya, özün cavab ver!
Mənim bədənsiz qollarım
gül-çiçək çələngini
görən necə tutacaq?
Dönüb bir cüt quş olunca
ağarıb göy üzündə
bədənsiz necə uçacaq?
Ömrü darda, başı qalda,
o təklənən torpağımı...
görən, havax, hansı üzlə
hansı təşviş içində...
necə, nə cür qucacaq?!...
OX, XUDAVƏNDİN DİVANƏ MƏXLUQU!
Qayıtma, qartal, qayıtma!
Qayıtma, qoca qartal, qayıtma!
O qaya daha səninki deyil!
Artıq orda
sənin çətirli yuvanda
çil-çil... ala qarğalar
yumurtalar qoydular.
Qayıtma, qoca qartal,qayıtma!
Pərişan olarsan.
Axı yuvan indi orda -
dağınıq... və məşum!..
...Ox, Xudavəndin divanə məxluqu,
Asimanda bir zaman
Vıyıldayan ən hündür havalı!
Yox, qayıtma! Dərd verər sarsıntı.
Axı sənin çəpərsiz o Qaya Məskənini
Özəlləşdirdi artıq qarıltılar hasarı!-
...Bəli, bəli, başdan-başa vahimədir,
Qar-qardan savayı qandıqları
olmayan həyat bihudələri!
...Oy, qartal!
Qayalar füsunu!
Elə məhzun zillənmə! Binəva!..
Yoxdur daha sənin o Ulu Yuvan!
Ağlatma!..
Ağlatma qoca qartal!..
Ağlatma...
NİYƏ GƏLDİM?
Nilufərlər solan çağı
Mən bu gölə niyə gəldim?
Niyə axı bura gəldim?
Gəlmişdimsə niyə gəlib
Niyə getdim?
Ah, bilən yoxdur
bağrım başı nədən belə
bölük-bölük?
Nədən axı qəmgin olur
Könül belə o göl sarı?
Bəs nə üçün çıxdım getdim
Nilufərlər solan çağı?
14 aprel, 2014
APAR MƏNİ, APAR
Mən gedirəm axar çaya deyəm ki,
Mənim sadiq yarım ol,
Al məni də qoynuna,
apar get.
Mən gedirəm axar çaya deyəm ki,
Mən burda darıxıram, ögey kimiyəm sanki.
Apar məni uzaqdakı məcrana,
Ört üstümü çınqıl-mərcanlarınla,
Apar, get.
Könül yaman sıxılır...
Apar get, ən dərin dəryaçana
O sözü də...pıçılda sən ona.
De ki, asimanla aranızda qalacaq
Mənim sənə sonuncu dediklərim.
Apar get...
Apar, apar,
Yadlardan yorulmuşam, aşiyan ol,
Sərinlik istəyir can...
Apar, məni də apar!
Daha könül qəhr edir.
Apar, apar!
Axar çay...
MƏNƏ SOYUQDUR, GÜNƏŞ...
Günəş!.. Mənə soyuqdur
Axı mən qütbə gedən tək gəminin
məzlum mənzərəsinə dözümsüz oluram.
Axı üşüyürəm mən hərdən
azad qanad yoluna atəş açan
zalım ovçu üzündən.
... Günəşim! Tez-tez röyalarımdasan!
Bir dəfə də xəyalımda
səninlə öpüşəndə,
qucaqlaşıb demişdim:
Məhvəşim! Atəşim! Sahib dur!..
Məşum toxunur hər şey.
Çək məni, apar məni.
Apar, apar!......
Yerdə mənə yaman soyuqdur, Günəş!
ƏNDƏLÜZ BÜLBÜLLƏRİMİ XATIRLADIM
Ötmə bülbül, boynun yaman yorulur,
Ötmə, sən Allah, ötmə,
Gizlənqaç oynama sən mənimlə,
sitəm olur sinəmə.
lll
Bülbül, uç gəl, uç gəl otur yanımda
Gəl bir az da oxu sən -
Oxu!.....
Oxu, yadıma salım dünyanı.
lll
Bülbül, dön gəl, ölərəm.
Mən axı bir zaman
ən gözəl cəhcəhli
əndəlüz bülbüllərimi dinlədim.
lll
Naz eləmə, oxu sən,
bir günlük aldat məni,
aldat mənim bu intizar könlümü.
Elə bilim ki yenə o gözəllik çənində,
əndəlüz bülbüllərimin
füsunu içindəyəm...
2014
OY, QƏLBİM, KƏDƏR MÜLKÜM!
...Əl çəkməyir
ləngər döyən lal sükut,
qısılıb məhəccərə.
Öndə mənim üçün də
vədəsi şirintəhər...
yeni əsarət toxuyur.
Fəraqın ağrı
sı bu!
Bürünüb canımıza.
Oy, qəlbim, kədər mülküm!
Öldürəcək lal sükut
bir gecə
bizim ikimizi də...
XƏYALƏT
...Axşamüstüdür indi,
Qaya daşına əyləşib
Bayaqdan fikirləşirəm;
Niyə mənim sirdaşım
Elə yalnız öz bağrım?..
Və niyə axı baharın gözəl çağı
əhval belə dağınıq?..
11 may, 2013
QÜRBƏT NAĞILI BİLDİM
Qürbət nağılı bildim,
yaş parlayan an ilə
dan yerinə millənən
bir laməkan ah arası
sabit duran sükutu.
Həmdəm bir ağrı bildim,
ağaran toran ilə
mükəddər simlər arası
tək uçan leylək lələklərinin
fağır qağıltılarını.
NEYSANDIR
Neysandır...
Baharın ehsanıdır,
qoy yağsın!
çıppıldasın kollarda,
sakit etsin
yalqız kahaları da,
dualarda bulunsun onlar da.
...Mən də belə, qiblə bilim
yağmuru,
Burdan heç tərpənməyim!..
Qoy yağsın...
DÜNYA ÇIXIB YADIMDAN
Tanrım, bağışla məni,
dünya çıxıb yadımdan.
Heç bilmirəm səma harda, yer harda?
İnsanlar hardadır, mən harda?
Təkcə İsa Məsihin
Çaharmıx edamında o saralan çöhrəsi
Asılıb eyvanımdan, çökür bəbəklərimə,
Çəkilmir xəyalımdan.
Bir də ki, zavallının
"canım ölümcül dərəcə kədərlidir"-naləsi!
Nisgil təbili döyür mənim
mütəəssir... qulaqlarımda...
ƏCƏBA
Günəşi də qıpqırmızı su içində
yola saldı gözlərim.
Əcəba, daha nəyin bəhsini
vuracaqmış mənimçin
Günəşdən sonrakı
arı vızıltıları?
Nəyi anladacaqmış
qürubda boş qalmış
su kimi...
sərab kimi
bu ıssız qərib çöl?
Əcəba?
QÜBBƏDƏ NƏ ŞAHANƏ SÜZÜRSƏN, ŞAHİN QUŞ
Qübbədə
Nə şahanə süzürsən, şahin quş?
Bir az yerə yovuq uç,
leysan var buludlarda, göyçəyim,
sellənər...aşıb-daşıb, əzə bilər...
Mənim isə heyfim gəlir
şahanə uçuşuna,
həm də mən
sənə qəlbən aludə,
Şahin quş!
Sənə dair bir şərqim də bunu deyir.
Eşitsən, şadman olarsan,
bir az yerə yovuq uç,
Unudaq böyük əziyyətləri!
Şahin quş!..
O şərqini birlikdə dinləyək...
7 iyul, 2014