Prezident İlham Əliyev Bakının Xətai Rayon İcra Hakimiyyətinin binasında aparılan yenidənqurma işləri ilə tanış olub.
525.az-ın prezidentin rəsmi saytına istinadən verdiyi məlumata görə, Xətai Rayon İcra Hakimiyyətinin başçısı Razim Məmmədov görülən işlərlə bağlı Prezident İlham Əliyevə məlumat verib.
Prezident İlham Əliyev vətəndaşların qəbulu otağında yaradılan şəraitlə tanış olub. Bildirilib ki, dövlət başçısının “elektron hökumət”in yaradılması barədə tapşırıqlarına uyğun olaraq, icra hakimiyyətinin elektron idarəetmə və məlumat bazasında vətəndaşların ərizə və şikayətlərinin elektron formada qəbulu da reallaşıb. Rayonun hər bir sakini icra hakimiyyətinin binasına gələrək bu sistem vasitəsilə elektron ərizə yaza və müvafiq şöbəyə göndərə bilər. Bununla yanaşı, vətəndaşlar bu sistemdən internetlə rayon icra hakimiyyətinin rəsmi saytına və ya bu bazaya daxil olaraq evlərindən birbaşa müraciət edə bilərlər. 220 yerlik konfrans zalında icra hakimiyyətinin və rayonla bağlı tədbirlərin keçirilməsi üçün hər cür şərait var.
Burada işıq, səs və digər müasir sistemlər quraşdırılıb. Bundan əlavə, bütün lazımi avadanlıqla təchiz olunan yeməkxana da istifadəyə verilib. Yeni inzibati binada işçilərin normal fəaliyyəti üçün geniş və hərtərəfli imkanlar yaradılıb. Otaqların hamısı müasir avadanlıq və inventarla təchiz olunub.
Müasir memarlıq üslubunda yüksək zövqlə yenidən qurulan binanın interyerində paytaxtın qədim görüntülərini əks etdirən fotolar vurulub. Kiçik konfrans zalında müxtəlif toplantıların keçirilməsi üçün hər cür şərait var. Əlli yerlik müşavirə zalındakı şərait də ən müasir tələblərə cavab verir. Operativ idarəetmə mərkəzindən rayon ərazisində yerləşən bütün tikililər barədə məlumat almaq mümkündür. Xüsusi proqram rayondakı bütün mənzil-istismar sahələrinin ərazilərinin bölgüsünü aydın göstərir. İstehsalat qəzalarının, dağıntıların yaranması təhlükəsi baş verəcəyi təqdirdə mərkəzdə idarəetmənin, xəbərdarlığın və rabitənin təşkili sxemi də yaradılıb.
Binadakı şəraitlə tanış olan dövlət başçısı daha sonra icra hakimiyyəti binasının qarşısında yaradılan parka baxıb.
Ötən ilin sonlarından başlayan təmir və yenidənqurma işləri zamanı ərazidə geniş yaşıllıq zolaqlarının salınmasına xüsusi fikir verilib. Bununla bağlı çoxlu dekorativ ağaclar əkilib. Burada yaxınlıqda yaşayan əhalinin istirahəti üçün bütün imkanlar yaradılıb.
çap et