“ATƏT-in Minsk qrupunun fəaliyyəti beynəlxalq siyasi turizmə bənzəyir”. Belə bir açıqlama ilə Demokratik İslahatlar Partiyasının sədri, millət vəkili Asim Mollazadə çıxış edib. O deyib ki, həmsədrlər dünyanın ən gözəl şəhərlərində “görüşlər” keçirirlər, bir-biri ilə söhbət edib dağılışırlar: “Elə buna görə də 20 ildən artıqdır ki, münaqişənin həlli yoxdur. Münaqişənin həll olunmamasının ən əsas səbəbi ATƏT-in Minsk qrupunun beynəlxalq hüquq normalarına arxalanmaması, ona müvafiq qərarlar hazırlamamalarıdır. Ona görə də münaqişənin həlli tapılmır”.
Millət vəkili əlavə edib ki, Azərbaycanın əraziləri işğal olunub: “Bir qonşu digər qonşunun ərazilərini işğal edərək bir milyondan artıq insan qaçqın və məcburi köçkünə çevirib. Lakin ATƏT-in Minsk qrupu bu məsələ ilə bağlı öz töhfələrini ATƏT və digər beynəlxalq təşkilatlara verməyib. Yəni təcavüzkara qarşı hər hansı bir sanksiya və təzyiq olunmur. Necə olur ki, Ukraynadakı hadisələrdən sonra Rusiyaya ciddi sanksiyalar tətbiq edilir. Amma Ermənistana qarşı heç bir sanksiya qəbul edilmir”.
Həmsədrlərin tez-tez dəyişməsi məsələsinə toxunan A.Mollazadə deyib ki, tez-tez dəyişmələrinə baxmayaraq, həmsədrlərin mövqeyində ciddi bir fərq görmür: “ATƏT-in Minsk qrupu tərəfindən Beynəlxalq Hüququn aliliyindən istifadə olunmadığına görə problem həll olunmur”.
Yeni Azərbaycan Partiyası (YAP) Siyasi Şurasının üzvü, hakim partiyanın İqtisadi məsələlər komissiyasının sədr müavini Aydın Hüseynov isə bildirib ki, Azərbaycanla Avropa İttifaqı arasında yüksək münasibətlər mövcuddur. Cənubi Qafqaz regionunda Aİ-nin əsas ticari-iqtisadi tərəfdaşı Azərbaycandır. Bununla belə, Azərbaycan Ermənistanın təcavüzkar siyasətinin qarşısının alınması istiqamətində Aİ-dən ciddi səylər gözləyir.
Onun sözlərinə görə, Ermənistan-Azərbaycan, Dağlıq Qarabağ münaqişəsinin həlli istiqamətində Aİ fəal addımlar ata bilər: “Bunun üçün bu təşkilatın geniş imkanları var. Azərbaycan Prezidenti İlham Əliyev iyulun 23-də Avropa İttifaqının Cənubi Qafqaz üzrə xüsusi nümayəndəsi Herbert Salberin başçılıq etdiyi nümayəndə heyətini qəbul edərkən vurğulayıb ki, Azərbaycan münaqişənin sülh yolu ilə nizama salınmasına tərəfdardır. Amma qeyri-konstruktiv mövqe nümayiş etdirən Ermənistan isə nə beynəlxalq hüquqa, nə də həmsədr ölkələrin rəhbərlərinin bəyanatlarına məhəl qoyur. Münaqişə nəticəsində Azərbaycanın beynəlxalq birlik tərəfindən tanınmış ərazilərinin hələ də işğal altında olduğunu vurğulayan Prezident İlham Əliyev qeyd edib ki, əgər problem beynəlxalq hüquq çərçivəsində ədalətli həll olunmasa, regionda vəziyyət daha da mürəkkəbləşə bilər.
Təbii ki, prezidentin bu bəyanatı beynəlxalq təşkilatlar, o cümlədən Aİ və ATƏT-in Minsk qrupu üçün xəbərdarlıq olmalıdır. Çünki Ermənistan hakimiyyəti beynəlxalq birliyin bu məsələyə laqeyd yanaşmasından istifadə edərək özünün işğalçı siyasətini davam etdirir. Beynəlxalq qurumlar, o cümlədən Aİ nəzərə almalıdır ki, Azərbaycanın öz ərazi bütövlüyünü təmin etmək hüququ var. Bu hüquq BMT-nin nizamnaməsində öz əksini tapır. Əgər dünya birliyi regionumuzda vəziyyətin gərginləşməsini istəmirsə, Ermənistanı işğalçılıq siyasətindən əl çəkməyə məcbur etməlidir”.
Pərvanə
çap et