Azərbaycan Milli İncəsənət Muzeyi ilə Belarusun Milli Bədii Muzeyi arasında əməkdaşlıq əlaqələrinin daha da genişləndirilməsi məqsədilə ikitərəfli müqavilə imzalandı.
İmzalanma mərasimindən əvvəl mədəniyyət və turizm nazirinin müavini Sevda Məmmədəliyeva hər iki ölkə arasında əlaqələrin yüksələn xətlə davam etməsindən söz açıb, mədəni əməkdaşlığın genişləndiyini xüsusilə qeyd edib. Ümummilli lider Heydər Əliyevin Azərbaycanda muzey işinin inkişafına diqqət və qayğısından danışan nazir müavini bu gün həmin siyasətin Prezident İlham Əliyev, ölkənin birinci xanımı, Heydər Əliyev Fondunun prezidenti Mehriban Əliyeva tərəfindən uğurla davam etdirildiyini vurğulayıb. Belarusun Milli Bədii Muzeyinin baş direktoru Vladimir Prokoptsov müqavilənin imzalanmasının mühüm tarixi hadisə olduğunu deyib və bundan sonrakı əlaqələrin daha da genişlənməsinə, təcrübə mübadiləsinə öz layiqli töhfəsini verəcəyinə əminliyini ifadə edib. Qonaq Azərbaycandakı muzey işinin təcrübəsini yüksək qiymətləndirib.
İncəsənət muzeyləri arasında əməkdaşlıq əlaqələrinin genişləndirilməsi məqsədilə ikitərəfli müqaviləni Azərbaycan Dövlət İncəsənət Muzeyinin direktoru Çingiz Fərzəliyev və Belarusun Milli Bədii İncəsənət Muzeyinin direktoru Vladimir Prokoptsov imzalayıblar.
S.ABDULLAYEVA