İki yer
Hərə bir ömür yaşayır
ağlı, qaralı.
Mən də evlənmədim,
- Ondan sonra
qızlarımın başı, uca olsun, -
dedim.
Boş saxladım içimdə də bir yeri,
Soruşana:
- Tutulub,- dedim,
...bilsəm də
heç kim gəlməyəcək!
Boş saxladım
yatağımda da bir yeri,
kənarda görüşdüm,
kənarda sevişdim.
- Eqoistsən, - dedilər,
neynirsən iki yeri?
- Ehtiyat igidin yaraşığıdır"- dedim, -
nə bilmək olar, sabahın işini!
...Sabahlarsa tez dəyişir, tez ötür,
açılmamış, dünən olur,
bu gün olur,
sabahlar...
Ha gedirəm, çatammıram,...
çatammıram sabaha!
Düşünürəm:
- Axı mən ki "bərk sürürəm" bu ömrü!
Görən nədən,
niyə çatmır sabaha?...
Sözümdən keçənlər
Mənim itirdiklərimdi
sözümdən, yazımdan keçənlər
Yaza-yaza,
etiraf edə-edə itirirəm...
Söz-söz, cümlə-cümlə,
səhifə-səhifə itirirəm;
Yazıma hopan ahla, nəfəslə
içimə axan yaşla,
Boğazıma tıxanan qəhərlə,
sıxılan, darılan ürəklə itirirəm.
Sonra... itirdiklərimin
xiffətin edirəm,
Çaşıram:
- Hansısa əzası
kəsilib çıxarılmış adam
hələ uzun müddət
o əzanın yerində olduğu vaxtlardakı
vərdişini dəyişə bilmədiyi kimi
çaşıram!
Günahlarımı yumaq üçün
təkrar-təkrar oxuyuram,
oxşayıram onları:
Doğmalarım, yaxınlarım,
şirinlərim, acılarım...
- Necəsiniz? - deyirəm.
Necəsiniz, özümü də, sözümü də əyənlərim
-"bizi atdın"- deyənlərim...
Axı,
nə olur mənə olur
sizlərsə Söz ömrü qazanırsız
Söz ömrü insan ömründən
gör nə qədər uzundu, əzizlərim!